UELI'S MUNDART-GESCHICHTEN

Ueli Kormann erzählt im Dorfspiegel regelmässig seine Geschichten.

Hier stellt er sich gleich selber vor:

Wo nig vor 37 Jahr ufe Wase bi cho läbe, ha nig i dr Mopac afa Schicht schaffe u dert ha nig mir de scho gli mau inere Nachtschicht, irgendwenn nach Mitternacht, e grosse Hegu i ds Bei grammt. Was machsch da? S hett blüetet wie ne Moore… ke Frag: Ab zum Lämpigedokter, dä usem Bett ghout, u scho gli isch dä Schranz i mim Scheiche gnäiht gsi u ig ha chönne gah wyterschaffe. Denn ha nig dr Beat z erscht Mau gseh. U wiu dr Beat eso viu schpannendi Gschichte weiss z verzeue vo sinere Zyt aus Dokter im Wase, höckle mir zwe immer mau wieder chli zäme u ig fragene us, u är verzeut. U was är mir da so verzeut, das verzeue ig öich hie wyter.

Ueli Kormann